Binisita ni Presidente Ferdinand R. Marcos Jr. ti implementasion ti Zero Balance Billing (ZBB) iti Mariano Marcos Memorial Hospital and Medical Center (MMMH&MC). Binayabay isuna ni Gob. Cecilia Araneta-Marcos. Napnek ti presidente iti naimatanganna a napintas a pannakaipatungpal ti ZBB iti kadakkelan nga ospital ti probinsia. Itay napalabas nga State of the Nation Address (SONA) ni PBBM ditoy nga inbagana ti pannakaipatungpal ti ZBB kadagiti ospital nga adda iti babaen ti Department of Health (DOH) tapno saanen a marigatan pay dagiti pasiente nga agiremedio iti kuarta a pagbayadda.
Segun kenni Dr. Jose Orosa III, Officer-in-Charge Medical Center Chief ti MMMH&MC, sipud bulan ti Hulyo iti daytoy a tawen, umaboten iti 22 a ribo dagiti pasiente a nabenepisiaran iti daytoy a programa. Umabot iti 153 milion a pisos ti pakadagupan ti billing dagiti nasao a pasiente. Inpannakkel ni Orosa nga uray idi awan pay ti mandar ni PBBM a maipatungpal ti ZBB kadagiti kualipikado a pasiente, nabayagen nga ar-aramiden daytoy ti nasao nga ospital.
Malaksid iti ZBB, adu pay dagiti pasiente a mabenbenepisiaran kadagiti nagkakaadu a tulong nga ipapaay ti gobierno kadagiti pasiente ti MMMH&MC babaen iti suporta da Cong. Angelo Marcos Barba, Cong. Ferdinand Alexander “Sandro” Marcos III pakairamanan ni Senadora Imee R. Marcos. Maibilangen ditoy ti Medical Assistance for Indigent Patients (MAIP). Sipud bulan ti Pebrero agingga ti Setiembre iti daytoy a tawen, umaboten ti 40,200 a pasiente dagiti nabenepisiaran. Umabot iti 104 milion ti pakabaluran daytoy a naipaay a tulong. Basar iti datos ti DOH, iti intero a pagilian umaboten metten iti 298,221 a pasiente dagiti nabenepisiaran iti ZBB. Kaibatugan daytoy ti 24.6 bilion a pisos.
Ni PBBM ket kalikagumna a mapapintas ti serbisio iti benneg ti salun-at kadagiti amin a kakailian. Daytoy ti rason no apay nga adu dagiti naipatungpal a programa a mangipaay ti tulong kadagiti pasiente tapno saanen a marigatan pay dagitoy. Uray ti Provincial Government of Ilocos Norte (PGIN) iti panangidaulo da Gob. Araneta-Marcos ken Bise Gobernador Matthew J. Marcos Manotoc ket saan nga agsarsarday a mangpappapintas ti health sector babaen iti pannakapabaro dagiti pasilidad, pannakagatang dagiti baro a medical equipment ken pannakai-empleo dagiti adu a medical health practitioners kadagiti nagduduma nga health institutions nga adda iti babaen ti PGIN.
Electric Cooperatives ti Region 1, timmulong iti INEC a mangisubli ti koriente ditoy probinsia
Ti Ilocos Norte ti maysa kadagiti dinidigra ni Super Typhoon Nando. Gapu iti napigsa nga angin ken tudo, adu dagiti pasilidad ti Ilocos Norte Electric Cooperative (INEC) dagiti nadadael. Daytoy ti nangitunda iti panagpukaw ti serbisio ti koriente iti intero a probinsia. Kas iti datin nga ar-aramiden ti INEC, uray kangitingitan ti kalamidad kas iti bagyo ken layus, addada latta mangkitkita iti alisto a pannakaisubli ti serbisio ti koriente. Ngem, babaen iti liderato ni Assistant General Manager Perry Martinez, kankanayon a maipangpangruna ti seguridad dagiti empleado ti INEC. Iti ababa a pannao, masapul a saan a mai-risgo ti biag dagitoy. Nagkiddaw met nga ensigida ti panag-padispensar kadagiti umili iti saan nga ensigida a pannakaisubli ti serbisio ti koriente.
Ensigida met a nangipaay ti tulong dagiti lima nga electric cooperatives ti Region 1. Nabukel ti Region 1 Electric Cooperative Task Force, a pakaibilangan ti Ilocos Sur Electric Cooperative (ISECO), La Union Electric Cooperative (LUELCO), Pangasinan Electric Cooperative I (PANELCO I), Central Pangasinan Electric Cooperative (CENPELCO), ken Pangasinan Electric Cooperative III (PANELCO III). Babaen iti tulong dagitoy, naisubli iti kabiitan a panawen ti serbisio ti koriente kadagiti amin nga Member Consumers ti INEC.
Inpadanon met nga ensigida da Gobernador Cecilia Araneta-Marcos ken Bise Gobernador Matthew J. Marcos Manotoc ti panagyamanda iti INEC iti panangaramidda kadagiti amin a kabaelanda tapno maisubli ti serbisio ti koriente. Kangrunaan a nagyamananda dagiti pannakabagi dagiti nagduduma nga electric cooperatives iti Region 1 iti panangipaayda ti tulongda iti INEC.
