Napintas ti direksion ti Ilocos Norte babaen iti liderato ni Gob. Cecilia Araneta-Marcos. Daytoy ket maibasar iti pakabuklan ti First 100 Days Report ti gobernadora a naangay iti baro ken kaluklukat nga Ilocandia Cultural Center (ICC) iti Siudad ti Batac. (Ti ICC ket proyekto ni sigud a First Lady Mrs. Imelda R. Marcos, ken agserbi metten daytoy a legacy-na.) Ti panangipadanon ti gobernador dagiti nagapuananna kasta metten ti plano ti lideratona ket dinar-ayan dagiti opisiales ti probinsia, dagiti mayor, bise mayor kadagiti nagduduma nga ili ken siudad, pakairamanan dagiti adda iti nagduduma a sektor, kameng ti pamilia ken dagiti nasinged a pagayamna.
Immuna nga inpeksana ti panagyamananna kadagiti nagbalin a gobernador ti Ilocos Norte kas kada Presidente Ferdinand R. Marcos Jr, Senadora Imee R. Marcos ken Bise Gobernador Matthew J. Marcos Manotoc. Segun kenkuana, napintas ti pundasion ti Ilocos Norte babaen kadagiti tallo a nagbalin a gobernador. Ket ita, mariknana a saan unayen a marigatan gapu ta naisaganan ti probinsia para iti napintas a pagbanaganna babaen iti administrasionna.
Dagiti rinugian da PBBM ken Senadora Imee idi isuda ti gobernador ket intultuloy ni Bise Gob. Marcos Manotoc. Gapu iti dayta, in-inot a nagbaliw ti situasion ti Ilocos Norte. Pimmintas ti sektor ti salun-at. Adu a trabaho dagiti napataud. Ken nagbalinen a pagdidinnamagan ti probinsia kangrunaanen iti benneg ti turismo. Adu dagiti inpatungpalpalna a baro a programa ken proyekto a nakabenepisiaran dagiti amin a kakailian.
Ti direksion ti liderato ni Gob Araneta-Marcos ken agsadag iti Cerbisio A Mapagtalkan: Narang-ay a Pagnaedan! Daytoy a balikas ti mangipalagip kadatayo a ti panangidaulo ket masapul a mangrugi iti kaadda iti sirmata nga addaan iti pammati ken panagtalek dagiti umili. Ngamin, ti sirmata nga awanan ti panagkaykaysa ket awan ti pagbanbanaganna. No adda ti panagkaykaysa dagiti amin nga umili ken panangiraman kenni Apo Dios ket sigurado a mangitunda iti progreso.
Iti umuna a 100 nga aldaw, adun dagiti inaramid ni Gob. Araneta-Marcos a reporma tapno ad-adda pay nga agbalin a napintas ti serbisio ti Provincial Government of Ilocos Norte (PGIN). Adda ti maiyusuat a panagtataripnong (fellowship) dagiti amin a mangidadaulo kadagiti nagduduma a departamento pakairamanan dagiti kameng ti Sanguniang Panlalawigan iti kada umuna a martes ti tunggal bulan. Ditoy a mapagsasaritaan no ania dagiti nasken a maipatungpal para iti pagsayaatan ti kaaduan. Inbilinna pay ti kanayon a koordinasion iti nagbaetan dagiti dagiti bokales ken nagduduma a departamento tapno maka-aramidda kadagiti paglintegan a maiyannatop iti agdama a situasion. Ken kangrunaanna, ti panagtinnulongda kenni Bise Gob. Marcos Manotoc tapno maikkaten dagiti posision iti PGIN nga addaan iti Salary Grade 1 ken 2. Ngamin, dagitoy ket nababa unay ti sueldoda, saan a makaanay iti agdama nga estado ti panagbiag.
Adu dagiti plano nga aramiden ni Gob. Araneta-Marcos nga aramiden iti lideratona. Kas maysa nga ina, kalikagumna a kitaen no kasano a pumintas ti pagbanagan dagiti annakna. Iti agdama, dagiti mannalon ken mangngalap dagiti agkasapulan iti naan-anay nga atension – dagitoy dagiti ibilangna a kasapulan a maipaayan ti umiso a suporta. Kankanayon nga ibagbaga ti gobernadora a dagiti mannalon ken mangngalap dagiti banuarna. Ken siempre amin a sektor ket maipaayan iti importansia tapno maragpat ti al-alisto a progreso.
Ditoy Ilocos Norte, natalgedtayo babaen kenni Nanay Ces gapu iti lideratona a Cerbisio A Mapagtalkan: Narang-ay a Pagnaedan!. Ken siempre, babaen iti suporta da Bise Gob. Marcos Manotoc kangrunaanen da PBBM, Senadora Imee, Cong. Angelo M. Barba ken Cong. Ferdinand Alexander A. Marcos III.
