Nupay napigsa ti angin ken tudo, saan a dagitoy ti nanglapped kenni Gob. Cecilia Araneta-Marcos a nagsursor kadagiti nagduduma a paset ti probinsia kabayatan ti isasaplit ni Bagyo Nando. Ti nasao a bagyo ket nangipaay iti napigsa nga angin ken tudo iti nagduduma a paset ti Northern Luzon karamanen ti probinsiatayo. Nangitunda pay daytoy ti storm surge kadagiti coastal areas. Segun iti PAGASA, ti bagyo Nando nga addaan iti international name a Ragasa ket maibilang a Super Typhoon. Kadagiti ili ti Pagudpud, Burgos, Adams, Bangui, ken Dumalneg ti nakaibayugan ti Cyclone Wind Signal No. 4, idinto nga iti nabat-bati a paset ti Ilocos Norte ket adda iti babaen ti Signal No. 3.
Ni Gob. Araneta-Marcos ket kayatna a personal a maamoan no ania ti situasion dagiti kakailian kangrunaan kadagiti lugar a napakaroan tapno ensigida a maipaay ti Provincial Government of Ilocos Norte (PGIN) ti maiyannatup a tulong. Ditoy nga indauloanna ti pannakaibunong dagiti relief goods kadagiti adda kadagiti evacuation centers. Kinadua ti gobernadora dagiti pannakabagi ti Provincial Social Welfare and Development Office (PSWDO), Provincial Disaster Risk Reduction and Management Office (PDRRMO), Ilocos Norte Provincial Police Office (INPPO), ken sabsabali pay a frontline agencies tapno maipasigurado a maipaay ti kasapulan dagiti kakailian.
Kasangoanan pay ti iduduprak ti nasao a bagyo, naiyusuat dagiti serye ti taripnong nga indauloan ti gobernadora tapno iti kasta ket makapagsagana ti PGIN ken dagiti amin a kakailian kadagiti possible a negatibo nga epekto ti nasao a bagyo. Iti agdama, manarimaan ti pannakaukkon dagiti nagbalin a perdision kas kadagiti nadadael a pagtaengan, prudukto iti pagtatalunan, livestock pakairamanan iti benneg ti infra-projects. Awan ti sabali a kalkalikaguman ni Gob. Araneta-Marcos no di ti kanayon a kinatalgedtayo iti tunggal kaadda dagiti kalamidad a sumangbay. Masapul laeng ti kooperasion ti tunggal maysa kadatayo, masapul a dumngegtayo kadagiti pammilin dagiti utoridad ken kangrunaanna, masapul a kitaentayo ti kinatalgedtayo. No maaramidtayo amin dagitoy, sigurado saantayo unay a mapakaroan nupay kasano ti kapigsa wenno kadawel ti sumangbay kadatayo a kalamidad.
Agtutubo, saan a dumngeg kadagiti awan kaeseskanna a balakad
Naruay dagiti nakipagpaset kadagiti naiyusuat a rally itay napalabas a September 21. Dagitoy a rally ket namunganay kalpasan nga inbulgar ni Presidente Ferdinand R. Marcos Jr. ti nakaro a mapaspasamak nga irregularidad iti pannmakaiyimplementar dagiti flood control projects. Kadagiti nagbalin a rakurak ni PBBM, saanna a babalawen dagiti makipagpaset kadagiti rally gapu ta ammona ti karirikna dagitoy. Ngem nupay kasta, masapul a dagiti rally ken dagiti makipagpaset ket ipangpangrunada ti panagbalin a natalna ken nasken nga awan dagiti madangran.
Ngem no maminsan, adu dagiti personalidad dagiti manggungundaway iti agdama a situasion. Dagitoy dagiti addaan iti personal interest. Maysa ditoyen ni dati nga Ilocos Sur Governor Luis Chavit Singson. Ngamin, kalikagum na a makipagpaset dagiti agtutubo babaen iti saanda nga iseserrek iti pagadalan agingga a saan a maikkat dagiti opisial ken empleado ti gobierno a karaman iti nakaron a panagkunniber.
Para kadagiti padak nga agtutubo: laglagipen ken nasken a nalawag para kadatayo amin. Ti pudno a panagbalbaliw ket maragpat, saan a babaen iti saan nga iseserrek iti klase. No saantayo a sumrek iti pagadalan, saantayo a mapa-kapsut ti corruption ngem ketdi ti bagbagitayo ti kumapsut.
Ti edukasion ket isu ti kabilegan ken katademan nga armastayo. Ipaayna kadatayo ti umiso a panagpanpanunot, talento, ken napintas a kababalin tapno maiparuartayo ti kinapudno, ken tapno madadael ti nabayagen a sistema ti panagkurakot. Daytoy ti rason no apay nga adu dagiti adda iti poder ti mangkabuteng kadagiti edukado nga agtutubo, ammoda a saandatayo a malokloko.
Isu a, gut-gutigotenkayo a kanayon nga agatendarkayo kadagiti klaseyo. Agbasa, agsalodsod, makidebate ken makipagpasetkayo. Ti panagkunniber ket agballigi babaen iti kina-ignorante, ngem maparmek babaen kadagiti henerasion dagiti agtutubo a bumangon nga addaan iti umiso nga edukasion ken kababalin. Ti panag-protestatayo ket saan a babaen iti panangabandonartayo kadagiti klasetayo. Awan ti makaparmek iti addaan ti napintas a kalidad nga edukasion. Ken kangrunaanna, awan ti kangrunaan a pang-laban kadagiti kurakot no saan a dagiti agtutubo a saanna nga ipalubos nga agbalinda a bulsek ken umel.
