Adu dagiti trabaho ni Congressman Ferdinand Alexander “Sandro” A. Marcos III iti House of Representatives. Kas Majority Leader, saan laeng nga iti First District ti Ilocos Norte ti ipapaayanna ti atension ngem ketdi iti intero a pagilian. Ken siempre, gapu ta anak isuna ni Presidente Ferdinand R, Marcos Jr., saan a maliklikan nga adu dagiti umasideg kenkuana nga agpatulong. Ngem nupay kasano ti kaado ti trabahona, ikagkagumaanna ti mangbisita kadagiti kakailianna iti umuna a distrito ti Ilocos Norte.
Iti kaadda ni Cong. Sandro iti probinsia idi Oktobre 16 ken 20, 2025, naruay manen a serbisio ti naipaay kadagiti residente iti Primero Distrito. Umabot iti Php66,043,340.00 ti balor dagiti naipaay a serbisio kadagiti kakailian. Daytoy a kantidad ket pakaibilangan ti pay-out ti TUPAD, AKAP, Tulong Dunong Program pakairamanan ti pannakaipaay ti tulong pinansial kadagiti pamilia a nadadael ti pagtaenganda gapu kenni Bagyo Nando babaen iti National Housing Authority.
Inpasigurado ni Cong. Sandro nga agingga nga adda iti puesto ket ipaayna ti adu a serbisio kadagiti kakailianna. Daytoy ket babaen iti pannakailatang ti umdas a pundo kadagiti nagduduma a programa a pakabenepisiaran dagiti amin a kakailian. Iti 2026 National Budget, inrupir na ti pannakailatang ti dakdakkel a pundo para iti primero distrito. Kangrunaanen ditoy iti agrikultura, salun-at pakairamanan ti benneg ti edukasion. Inyalikagumna ti pannakaipaay ti ad-adu a pundo kas suporta kadagiti mannalon, pannakapapintas dagiti balay pagagasan babaen iti pannakagatang dagiti moderno a kagamitan ken pannakaipasdek dagiti nayon a classroom building tapno iti kasta ket maipaayan ti sulosion ti nabayagen a problema ti Department of Education (DepEd) a panagkurkurang ti school building ditoy lugartayo.
Awan ti anomalia kadagiti naipasdek a proyekto iti Primero Distrito sipud nagtugaw ni Cong. Sandro
Nabara pay laeng a mapagsasaritaan ti flood control project nupay sumagmamanon a bulan ti napalabas sipud inbulgar daytoy ni Presidente Ferdinand R. Marcos Jr. Adu metten kadagiti umili dagiti matektekan gapu ta ibilangda a naginad ti pannagna ti maisaysayangkat nga imbestigasion babaen iti Independent Commission on Infra-structure (ICI). Adun kadagiti kakailian ti mayat a makakita no siasinno kadagiti empleado ti Department of Public Works and Highways (DPWH), opisial ti gobierno ken dagiti kontraktor dagiti mabalud gapu iti pannakainaigda kadagiti napnoan anomalia a flood control projects. Ngem kas panangipasigurado ni PBBM, amin dagiti adda pannakainaigna iti daytoy nga eskandalo ket nasken nga agsungbat babaen iti napintas a pannakaiplastar dagiti maipila a kaso iti korte kontra kadagiti maseknan.
Iti pasetna ti Primero Distrito ti Ilocos Norte, inpasigurado ni Cong. Sandro a sipud nagtugaw a diputado ket awan dagiti naipasdek a proyekto a nagameran kadagiti irregularidad. Itay kallabes, nagwaras iti social media ti ladawan dagiti nadadael a flood control project iti ili a Vintar. Basar kadagiti dukemento manipud iti DPWH, dagitoy ket naipatungpal kasanguanan pay a nagbalin a diputado ni Marcos. Addan dagiti nagduduma nga ahensia ti gobierno nga immay nagimbestigar iti sakup ti primero distrito a nakapaneknekan nga awan irregularidad kadagiti naipatungpal a proyekto babaen kenni Cong. Sandro kangrunaanna, awn ti ghost project. Ngem nupay kasta, kiniddawna kadagiti amin a kakailian nga ireportda iti opisinana no adda dagiti ammo wenno makitada nga proyekto a saan a napintas ti pannakaiyimplementarna.
Gapu iti issue ti flood control project, awan pay laeng ti maipatungpal a flood control project iti 2026. Maikkan to laeng ti pundo apaman a madalusan daytoy a kontrobersia babaen iti pannakaipasigurado a panagsungbat dagiti maseknan ken pannakaurnos dagiti proseso tapno awanton ti makaitured nga agaramid kadagiti anomalia. Ti pundo a mailat-latang iti flood control projects ket mausar pay laeng iti sabali a departamento tapno maipaay ti ad-adu pay a serbisio ken tulong kas kadagiti mannalon, pannakapapintas dagiti ospital ken pannakaipasdek dagiti naruay nga school building tapno masulbaren ti panagkurkurang ti classroom nga usaren dagiti agad-adal.
Gob. CAM kalikagumna a nakasagana dagiti kakailian kadagiti sumangbay a kalamidad
Nagsasaruno dagiti mapasmasapak a gingined iti pagilian kangrunaanna iti pasetna ti Visayas ken Mindanao. Kadagitoy a gingined, nangitunda ti pannakairisang ti sumagmamano a biag ken pannakadadael dagiti adu a pasdek. Ti pagilian a Pilipinas pakairaman ti probinsia ti Ilocos Norte ket a pakapaspasamakan ti gingined gapu iti kaaddatayo iti makunkuna a Pacific Ring of Fire. Imbag pay ti bagyo ta masaganaan ngem ti gingined, awan pay ti napartuat a kagamitan a mangi-prediktar ti pannakapasamakna. Nasken ngarud ti naan-anay a panagsagana ken pannakaammo kadagiti nasken nga aramiden iti tunggal adda ti mapasamak a gingined kangrunaanna ti ibagbaga dagiti eksperto a “the big one”.
Ni Gob. Cecilia Araneta-Marcos ket kayatna a nakasaganatayo amin kadagiti aniaman ti klasena a didigra a sumangbay kadatayo kangrunaana ti gingined. Sipud nagtugaw a gobernador, addan dagiti narikna a gingined a nangitunda iti pannakataranta dagiti empleado iti Ilocos Norte Provincial Capitol. Ditoy a naimatangan ti gobernador ket mangipakita nga adu pay laeng dagiti empleado ti saan a makasurot iti makunkuna a duck, cover, and hold gapu iti nerbios ken panagbuteng. Segun iti gobernador, nasken a maipasagepsep iti tunggal maysa dagiti nasken nga aramiden iti tunggal adda ti sumangbay a gingined.
Tapno amintayo ket makapagsagana, inbilin ti Gob. CAM ti masansan a pannakaisayangkat ti earthquake drill. Ti Provincial Disaster Risk Reduction and Management Office (PDRRMO) iti panangidaulo ni Mr. Marcel Tabije babaen iti tulong ti Bureau of Fire Protection (BFP) ti mangipatungpal iti daytoy. Ti gingined ket saantayo nga ammo no into kaano a mapasamak, nasken ngarud ti naan-anay a panagsagana, panagbalin a kalmado tapno iti kasta ket mailikliktayo iti nakarkaro a perdision iti tunggal adda mapasamak a gingined. Ken kangrunaanna, ti panangkakaragtayo tapno iyadayonatayo ni Apo Dios kadagiti nagduduma a kalamidad kangrunaanna ti gingined.
