Kadagiti kallabes a tawen, nagbalin a public enemy number one dagiti residente ti probinsia ti Ilocos Norte Electric Cooperative (INEC). Nangrugi daytoy idi naipatungpal ti nangato a singir ti koriente. Kadagidi a panawen, awan a pulos ti naar-aramidan dagiti dati a nangidaulo iti INEC. Gapu iti dayta, nangaramid ti pamuspusan tapno maisubli ti panagtalek dagiti member consumers iti INEC ti pamilia Marcos kangrunaanen kada Presidente Ferdinand R. Marcos Jr, Senadora Imee R. Marcos, Bise Gobernador Matthew J. Marcos Manotoc, First District Congressman Ferdinand Alexander “Sandro” A. Marcos III pakairamanan ni Second District Congressman Angelo Marcos Barba.
Kas resulta, naipatugaw kas temporario a nangidaulo iti INEC ni Mr. Cipriano “Perry” Martinez. Babaen kenni National Electrification Administrator (NEA) Antonio Almeda, nadutukan ni Martinez kas Acting General Manager. Adu dagiti reporma nga inpatungpal ni Martinez kas iti pannakaurnos ti financial transactions kangrunaanen ti pannakaipababa ti singir ti koriente. Adu dagiti karit a sinango na. Adu nga empleado ken opisial ti INEC dagiti napilitan a nagikkat iti puesto. Adda pay dagiti empleado ken sigud nga empleado ti nangipila ti kaso kontra kenni Martinez. Ngem amin dagitoy ket nadesisionanan pabor kenni Martinez.
Ket ita, makita ken mariknan ti napintas a nagbanagan dagiti naipatungpal a reporma iti liderato ni Martinez babaen iti panangtultulong kenkuana ni Atty. Athena Nicolette A. “Nikki” Pilar. Saanen a marigatan dagiti member consumer gapu ta nababan ti singir ti koriente. Malaksid iti dayta, addan iti financial stable ti INEC. Awanen dagiti mapaspasamak a panagkunniber. Dagiti mapas-pasamak a transaksion ket paboren iti INEC, saan ket a para kadagiti sumagmamano laeng nga opisial ken empleado.
Kas pammaneknek nga addan iti financial stable ti INEC, gimmatangen kadagiti baro a lugan nga usaren ti dagiti empleado tapno al-alisto ti panagrespondeda no bilang adda dagiti mapasamak a power interruption ken pannakatarimaan dagiti linia ti koriente. Addan iti ikut ti INEC dagiti baro a 16 a unit ti L300 IPV ken 3 a unit ti manlift vehicle. Segun kenni AGM Martinez, dagitoy a pannakabaro dagiti lugan ket pakpakauna pay laeng. Adu pay dagiti ramit a gatangen ti INEC kadagiti masungsungad a bulan.
Maysa pay a pammaneknek nga addan iti napintas nga estado ti INEC ket ti pananginteres dagiti sumagmamano a dadakkel a pribado a kompania nga isudan ti mangimaneher. Makitan dagitoy a napintas ti plastar ti kooperatiba, isu a kayatdan nga alaen tapno isudan ti mangipataray. Ngem inpasigurado ti agdama a liderato ti INEC a saandanto a pulos nga ipalubos nga imaneher ti siasinnoman a pribado a kompania ti INEC. Iti babaen ti liderato ni Martinez, adda iti napintas a situasion ti INEC, a saanen a nasken pay nga imaneher ti siasinnoman.
GOB. CAM, PURSIGIDO A MANGIPADUR-AS TI HEALTH SECTOR TI PROBINSIA
Adu dagiti reporma nga inpatungpal ni Bise Gobernador Matthew J. Marcos Manotoc iti sektor ti salun-at idi isuna pay laeng ti gobernador ti probinsia. Ngem adu pay dagiti nasken a maaramid tapno ad-adda pay a mapapintas ti serbisio ti salun-at a maipapaay kadagiti amin a kakailian. Ni Gobernadora Cecilia Araneta-Marcos ket pursigido a mangipatungpal iti ad-adu pay a reporma iti sektor ti salun-at. Rinugiannan a pinasiar dagiti nagduduma a balay pagagasan nga adda iti babaen ti Provincial Government of Ilocos Norte (PGIN) kangrunaanna iti Governor Roque B. Ablan Senior Memorial Hospital (GRASMH).
Kayat ni Gob. Araneta-Marcos a maileppas iti kabiitan a panawen dagiti manarimaan ti pannakaipasdekna a pasilidad tapno mausaren dagiti umili kangrunaana kadagiti pasiente. Adda metten ti panangipasigurado ti Provincial Engineering Office (PEO) tapno maiyalisto ti pannakairingpas dagitoy a pasdek. Agtultuloy met ti koordinasion na kadagiti mangidadaulo ti Department of Health (DOH) para kadagiti medical equipment a mabalin nga maipaay kadagiti opistal nga adda iti babaen ti probinsia.
Iti biang dagiti bakante a posision, addan ti ar-aramiden ti Human Resource Management Office (HRMO) tapno dagitoy ket malitupan. Addan dagiti dagiti baro nga empleado (job order) kas kadagiti nurses. Adda metten dagiti nai-promote manipud job order, nagbalin dan a casual ken permanente. Iti liderato ni Gob. CAM, kayatna a napintas ti sagrapen dagiti kakailian iti pannakatratoda no dagitoy ket agturong kadagiti nagduduma nga health institution nga adda iti babaen ti PGIN.
