Kalikagum ni Gob. Cecilia Araneta-Marcos a napintas ti direksion ti probinsia ti Ilocos Norte kabayatan ti panangidaulona ti probinsia. Daytoy ti rason no apay a kanayon ti isaysayangkatna a taripnong kadagiti opisiales dagiti nagduduma a Local Government Units (LGU’s) ti probinsia, dagiti mangidadaulo kadagiti naduduma a sektor kangrunaanen dagiti ahensia ti gobierno nasional. Kayat ti gobernadora nga agtutunos dagitoy para iti napinpintas a panagprogreso ti probinsia.
Iti pannakitaripnong ni Gob. Araneta-Marcos kadagitoy, inbinsa-binsana dagiti kayatna a direksion ti lideratona. Ditoy a kiniddawna ti naan-anay a suporta dagitoy kadagiti kalikagumna nga ipatungpal a programa ken proyekto. Nagkari met daytoy a mangipaay ti suporta kadagiti kalikagum dagitoy nga ipatungpal a programa ken proyekto kadagiti bukodda a lugar. Sangsangkamaysa met dagiti opisiales kadagiti nagduduma nga Local Government Units (LGU’s) a nangipaay ti suportada kadagiti kalikagum nga ipatungpal ti gobernadora.
Dagiti met kaudian a kinataripnong ti gobernador iti biang ti gobierno nasional ket pakaibilangan ti National Food Authority (NFA) nga idadauloan ni Engr. Jonathan Corpuz, Department of Information and Communications Technology of the Philippines (DICT) Region 1 nga idadauloan ni Director June Vincent Manuel Gaudan, Commission on Audit (COA) Region 1 nga idadauloan ni Director Olympia Balugay. Kinataripnong pay ti gobernadora dagiti pannakabagi ti North Luzon Green Power, Inc.
Adu dagiti kalikagum ni Gob. Araneta-Marcos nga ipatungpal tapno iti kasta ket ad-adda pay nga agbalin a naprogreso ti probinsia ken masagrap dagiti amin a kakailian ti napinpintas pay a serbisio a mangitunda ti pannakaitag-ay ti panagbiag ti sapasap. Dagita a kalikagumna ket maragpat laeng no adda ti naan-anay a panagtutunos. Ken siempre, ti naan-anay a suporta dagiti liderestayo a kas kada Bise Gobernador Matthew J. Marcos Manotoc, Diputado Angelo M. Barba, Diputado Ferdinand Alexander A. Marcos III, Senadora Imee R. Marcos kangrunaanna ni Presidente Ferdinand R. Marcos Jr.
PLTGEN Jose Melencio C. Nartatez Jr., baro a mangidaulo ti PNP
Agpadpada nga inpadanon da Gobernadora Cecilia Araneta-Marcos ken Bise Gobernador Matthew J. Marcos Manotoc ti nabara a panangkablaawda kenni PltGen. Jose Melencio C. Nartatez Jr. Daytoy ket kalpasan a dinutukan ni Presidente Ferdinand R. Marcos Jr. daytoy kas mangidaulo iti Philippine National Police (PNP). Pakaragsakan dagitoy ti panagbalinna a mangidaulo ti PNP. Ni Nartatez ket nagserbi a Provincial Director ti Ilocos Norte Police Provincial Office (INPPO) idi panawen ni Senadora Imee R. Marcos kas gobernador ti probinsia. Inpadanon met ti Senadora ti nabara a kablaawna kenni Nartatez.
Idi nagserbi ni Nartatez kas mangidaulo ti INPPO, adu dagiti inaramidna a programa ken reporma a nangitunda ti ad-adda pay a pannakapapintas ti serbisio ti PNP kadagiti kakailian kangrunaanen ditoy ti pannakatagiben ti linak urnos ken talna. Dakkel pay ti nagbalin nga akem na iti pannakaitabon ti bangkay ni dati a Presidente Ferdinand E. Marcos Sr. idiay Libingan ng mga Bayani. Isuna ti nangipamuspusan tapno iti kasta ket nalinak ti pannakaibiahe ti bangkay ti dati a Presidente manipud iti probinsia agingga a naipan idiay Libingan ng mga Bayani.
Apo Tateng, ipadanonmi ti nabara a kablaawmi kenka ken ikarkararagmi ti panagballigim a mangragpat kadagiti kalikagum ni PBBM a napintas a pagbanagan ti serbisio ti PNP kadagiti amin nga umili.
