Nabara a mapagsasaritaan iti agdama ti flood control projects. Nangrugi daytoy idi inbutaktak ni Presidente Ferdinand R. Marcos Jr. ti kaadda dagiti saan a napintas ti pannakaipasdek na a flood control projects iti nagduduma a paset ti pagilian kabayatan ti State of the Nation Address na iti panaglukat ti 20th Congress. Dagitoy a proyekto dagiti mangparparigat kadagiti naruay nga umili gapu ta saan met nga epektibo dagitoy iti laksid a bilion a pisos ti ginastos ti gobierno. Mismo payen a ni PBBM ti personal a napan nangkita kadagiti sumagmamano a proyekto a maibilang a ghost projects.
Iti agdama, manarimaanen ti imbestigasion nga isaysayangkat ti kongreso tapno maipaayan ti pannusa dagiti adda pannakainaigna kadagitoy ken saan ton a maulit pay kadagiti masanguanan. Ngem no amirisen a naimbag, saan kuma laeng a dagiti anomalya pakaseknan iti pannakaipatakder dagiti flood control projects ti kitaen ti gobierno. Nasken kuma nga adalen a naimbag no kasano a malappedan ti nakaro a layus babaen iti panangiyaplikar ti siensia kas iti makunkuna a Project NOAH (Nationwide Operational Assessment of Hazard) karamanen dagiti negatibo nga epekto makunkuna a global warming wenno climate change.
Iti biang mi nga agtutubo, adun dagiti ipatpatungpalmi a programa tapno ad-adda pay a maawatanmi no kasanon ti kinakaro ti epekto ti climate change. Daytoy ket tapno makaaramid kami kadagiti programa ken proyekto a pakipagpasetan dagiti agtutubo iti intero a pagilian tapno iti kasta ket makatulong a manglaban iti kumarkaro nga epekto ti climate change. Iti biang ti National Youth Commission (NYC), adu dagiti pakaaw-awisan dagiti opisiales ti NYC a programa pakaseknan iti pannakatagiben ti aglawlaw. Kas iti ASEAN Strategic Policy Dialogue on Disaster Management (SPDDM) 2025 a naangay idiay Singapore. Kas maysa a Commissioner ken mangibagbagi ti NYC Luzon pakairamanan ni Mr. Arjan I. Perez ket napagasatantayo a nagatendar iti daytoy a pasken.
Iti daytoy a taripnong, nagtitipon dagiti lideres manipud iti ASEAN, dagiti eksperto ken dagiti sabsabali pay nga stakeholders tapno agsisinnukat kadagiti kapanpanunotan ken ad-adda pay a mangpabileg ti kooperasion tapno maipaayan ti sungbat dagiti agdama ken sumarsaruno pay a pangta nga ipaay dagiti kalamidad a mangapektar iti intero nga ASEAN Region. Daytoy ket maysa kadagiti kangrunaan nga aktibidad iti tunggal tawen ti ASEAN Committee on Disaster Management (ACDM), babaen ti tulong ti Singapore Civil Defence Force (SCDF), ASEAN Secretariat, AHA Centre, ken ti suporta European Union.
Sipud idi 2015, ti Singapore ti kanayon a pakaang-angayan daytoy nga aktibidad. Iti daytoy a tawen, addaan daytoy ti tema a “Building a Resilient Future: Advancing ASEAN’s Post-2025 Vision for Disaster Management.” Babaen iti daytoy a tema, napagsasaritan dagiti nasken nga aramiden nga addang iti tunggal tumaud dagiti negatibo nga epekto dagiti kalamidad ken pagbalinen dagitoy nga adal babaen iti AADMER Work Programme 2021–2025 ken ASEAN Vision 2025 on Disaster Management.
Babaen iti partisipasiontayo, naadaantayo ti gundaway a nangipaganetget ti importansia ti partisipasion dagiti agtutubo iti panangputar kadagiti pagalagadan kangrunaanna iti pannakaipababa dagiti risgo ti epekto dagiti kalamidad ken no kasano nga imaneher. Indariragtayo ti kaadda ti boses dagiti agtutubo a Filipino a sigurado a mangipaay iti napintas a pannakamuli dagiti estratehia ken mangbangon iti naandor ken mangipursigi kadagiti agtutubo nga agbalin a nakasagana a kanayon para iti napinpintas a kumunidad iti intero nga ASEAN.
Mayor ti ili a Bacarra, baro a presidente ti LMP-Ilocos Norte
Addan baro nga opisiales ti League of Municipalities of the Philippines (LMP) – Ilocos Norte Chapter. Ni Bacarra Mayor Nicomedes Dela Cruz Jr. ti nabotosan a mangidaulo iti nasao a grupo. Dagiti mamayores ti probinsia ti sangsangkamaysa a nangipaay ti talekda kenkuana gapu ta ammoda a natenneben iti serbisio ken kabalinanna ti mangidaulo iti grupo dagitoy.
Dagiti sabsabali pay nga opisial ti liga ket dagiti sumaganad; Executive Vice President – Hon. Rommel T. Labasan, Vice President, 1st District – Hon. Richard A. Degala, Vice President, 2nd District – Hon. Shiella A. Galano, Secretary – Hon. Joemelle S. Go Sy, Treasurer – Hon. Virgilio M. Calajate, Auditor – Hon. Ralph Conrad F. Medrano, Public Relations Officer – Hon. Homer M. Domingo. Agserbi met a Board of Directors dagiti sumaganad; 1st District Hon. Robella G. Gaspar, Hon. Denton Lawrence G. Garvida, Hon. Robert D. Aguinaldo, 2nd District Hon. Edward T. Quilala, Hon. Antonio V. Mariano, Hon. Edmar Vincent L. Bonoan.
Nagsapata met nga ensigida dagitoy babaen kenni Gobernador Cecilia Araneta-Marcos. Kinablaawanna dagitoy ken mamati a babaen kadakuada ket ad-adda pay a pumintas ti grupoda ken ad-adu pay dagiti maipaay dagitoy a serbisio kadagiti amin a kakailian. Inpadanon met ni Bise Gobernador Matthew J. Marcos Manotoc ti nabara a kablaawna kadagitoy. Ni Sanguniang Panlalawigan Member Joefrey Saguid ti dati a presidente ti League of Municipalities of the Philippines (LMP) – Ilocos Norte Chapter.
