Nagduduma dagiti aktibidad nga insayangkat ti Provincial Government of Ilocos Norte (PGIN) para iti Linggo ng Kabataang Sirib 2025 iti bulan ti Agusto. Ti Ilocos Norte Youth Development Office (INYDO) ti kangrunaan a nangiyimplementar kadagitoy nga aktibidad. Da Gob. Cecilia Araneta-Marcos ken Bise Gob. Matthew J. Marcos Manotoc ti nangpadaeg kadagiti kangrunaan a paset dagitoy nga aktibidad. Babaen iti Linggo ng Kabataang Sirib 2025, naikkan ti gundaway dagiti agtutubo a nangipakita kadagiti talentoda iti nagduduma nga aspeto.
Maysa kadagiti kangrunaan a paset ti selebrasion ket ti pannakapili dagiti Junior Provincial Officials. Ni Hon. Princess Emriche Jhone Carag ti napili kas Junior Governor idinto a ni Hon. Dayne Seandrake Sapaden ti Junior Vice Governor. Dagitoy pakairamanan dagiti napili a Junior Sanguniang Panlalawigan Members iti umuna ken maikadua a distrito ket naikkan ti gundaway a nakipagpaset ti Regular Session iti Sanguniang Panlalawigan.
Ditoy Ilocos Norte, adu dagiti programa a maipapaay kadagiti agtutubo. Ni Senadora Imee R. Marcos ti nangirugi kadagitoy idi isuna ti gobernador ti Ilocos Norte. Dagitoy nga aktibidad ti mangisagsagana kadagiti agtutubo para iti panagbalinda a lider iti masanguanan. Iti agdama, naruayen dagiti agtutubo a dimmalan kadagiti programa ti PGIN babaen iti INYDO dagiti mangig-iggemen kadagiti nangangato a posision kadagiti nagduduma a sangay ti gobierno lokal ken nasional pakairamanan iti pribado a sektor.
Kas maysa kadagiti mangidadaulo iti National Youth Commission (NYC), adu pay dagiti ar-aramidentayo a programa a nairanta para kadagiti agtutubo. Ngamin, kayat ni Presidente Fedinand R. Marcos Jr. a maisagana dagiti agtutubo para iti masanguanan. Dagiti agtutubo ti namnama para iti masakbayan. Agtutubo, panawenmo ita.
Dagiti mannalon ti banuar ti probinsiatayo.
Inatendaran ni Gob. Cecilia Araneta-Marcos ti naisayangkat nga launching ti Sustainable Agroforestry Farm Enterprise ti Department of Agriculture kangrunaanna ti Bamboo Business Model, Gulayan sa Bayan Project, ken Coconut Farmers and Industry Development Plan a naisayangkat iti Barangay Camandingan, Batac City. Ti nasao nga aktibidad ket inatendaran dagiti nangangato nga opisial ti Department of Agriculture. Daytoy ket paset ti programa ni Presidente Ferdinand R. Marcos Jr. tapno maipasigurado a natalged ti taraon iti intero a pagilian.
Ti liderato ni Gob. Araneta-Marcos ket desidio a mangipaay ti naan-anay a suporta iti benneg ti agrikultura babaen iti pannakaisayangkat dagiti nagduduma nga aktibidad tapno matulongan dagitoy a mangitag-ay kadagiti apit da ken kangrunaanna, makaipaay ti umdas a taraon kadagiti amin nga umili kangrunaanna ti sumarsaruno nga henerasion. Kankanayon nga ibagbaga dagiti opisialestayo a dagiti mannalon ti banuar ti probinsiatayo ken namnamaenda ti agtultuloy a suporta ti gobierno.
Ni Bise Gob. Marcos Manotoc ti kangrunaan a nangipamuspusan idi isuna ti gobernador ti probinsia tapno iti kasta ket maipatungpal ditoy probinsia ti Sustainable Agroforestry Farm Enterprise. Iti agdama, adu pay dagiti sumarsaruno a programa ken proyekto ti Department of Agriculture para iti probinsia ti Ilocos Norte. Agtintinnulong ti gobernador ken bise gobernador babaen iti suporta da Diputado Angelo M. Barba, ken Diputado Ferdinand Alexander “Sandro” A. Marcos III, tapno iti kasta ket adu dagiti maipaay a tulong iti probinsia nga aggapu iti gobierno nasional. Da Senadora Imee R. Marcos ken Presidente Ferdinand R. Marcos Jr. ti nangipanamnaman kadagiti kallabes nga ipaayda ti naan-anay a suportada iti probinsia.
