Pinadaeg ti First Family iti panangidaulo ni Presidente Ferdinand R. Marcos Jr. ti pannakaselebrar ti maika-108 a tawen a panagkasangay ni dati a Presidente Ferdinand E. Marcos Sr. Iti ili a Sarrat a nakaiyanakan ti dati a Presidente ket adda met ti naisayangkat nga aktibidad kas iti naindaklan a misa iti Sta. Monica Church ken wreath laying ceremony iti sanguanan ti monumento ti dati a Presidente. Iti Siudad ti Batac ti nagbalin a sentro dagiti nagduduma pay nga aktibidad kas paset ti naindaklan nga okasion.
Immatendar pay ni dati a First Lady Imelda R. Marcos. Saan a mailadawan ti ragsak dagiti kakailian kangrunaanna kadagiti Marcos Loyalist iti pannakakitada manen iti First Family kangrunaanna kenni Mrs. Marcos. Ni Senadora Imee R. Marcos ket saan a nakaatendar kadagiti pasken ditoy probinsia, ngem isuna ti nangidaulo kadagiti naiyusuat a nagduduma nga aktibidad iti tanem ni
Apo Lakay idiay Libingan ng mga Bayani.
Da Gobernadora Cecilia Araneta-Marcos ken Bise Gobernador Matthew J. Marcos Manotoc met ti nangidaulo kadagiti local officials nga immatendar iti daytoy a pasken. Adu pay dagiti opisiales iti biang ti nasional ken dagiti kaparanget a probinsia dagiti nagatendar. Ditoy a naimatanganda no kasano ti panangay-ayat dagiti kakailian iti Pamilia Marcos.
Iti daytoy a selebrasion, naruay a serbisio dagiti naipaay kadagiti kakailian. Naiburay kadagiti mannalon dagiti nagduduma ti klasena a farm machineries, farm inputs ket nagduduma ti klasena a pagkasapulanda iti panagtalon. Adu met a medical equipment ti naipaay kadagiti nagduduma a Local Government Units a maiserbi kadagiti umili nga agkasapulan iti pannakasaranay. Sabali laeng dagiti immawat ti financial assistance.
Senadora Imee, kinablaawanna ni PBBM iti panagkasangayna
Inpadanon ni Senadora Imee R. Marcos ti nabara a kablaawna iti selebrasion ti maika-68 a panagkasangay ni Presidente Ferdinand R. Marcos Jr.. Iti official facebook page ti senadora ti nangipadanonanna ti kablaawna iti kabsatna. Adu a kakailian pakairamanan dagiti Marcos Loyalist dagiti naragsakan iti pannakakitada ti kablaaw ti senadora iti presidente. Adda ngamin dagiti sayangguseng itay kallabes a saan a napintas ti relasion dagiti agkabsat gapu iti politika ken adu pay a sabsabali. Ngem adda metten dagiti nagbalin a palawag ti Senadora kadagiti kallabes pakaseknan iti relasionda iti presidente a nagkunaanna a “ti kabsat ken kabsat to latta”.
Saan met a nagpaudi dagiti opisiales ti probinsia iti panangidaulo da Gobernadora Cecilia Aranata-Marcos ken Bise Gobernador Matthew J. Marcos Manotoc a nangipadanon iti nabara a kablaawda iti presidente. Kas paset ti selebrasion ti panagkasangay ti presidente, naruay dagiti aktibidad a naiyusuat ditoy probinsia. Adu dagiti naipaay a tulong kadagiti umili nga inpaay dagiti nagduduma nga ahensia ti gobierno kas pammilin ti presidente.
Iti agdama, naruay dagiti parikot a sangsanguen ti pagilian. Adu dagiti pakaburburiboran ti presidente kas kuma iti West Philippine Sea, kinarigat ti panagbiag dagiti adu a Filipino, kangrunaanen ti flood control projects. Kadagitoy a sangsanguen ti presidente, kapintasan nga isagot tayo kenkuana iti daytoy a panagkasangayna ket ti panangikarkararagtayo nga ipaayan ni Apo Dios iti umdas a salun-at ken ti panagballigina kadagiti amin nga ar-aramidenna a para iti pagsayaatan ti tunggal Filipino.
