Dinayyeg ti napigsa a gingined ti probinsia ti Cebu idi agarup alas dies ti rabii, Oktobre 1, 2025. Ti Bogo City ti kangrunaan a nagsaprap ti nakaro a perdision. Iti pag-rukodan ti Philippine Institute of Volcanology and Seismology (PHIVOLCS), nagpigsa ti nasao a gingined ti 6.9 magnitude. Gapu iti daytoy, naruay a pasdek pakairamanan dagiti pagtaengan, kalsada ken rangtay dagiti nadadael babaen iti pannakarpoog ken panag-rikki dagitoy. Naruay met a biag dagiti nairisang (iti kaudian a datos, umaboten iti 72 dagiti natay ngem posible a ngumato pay gapu ta adu pay laeng dagiti mapukpukaw). Dagitoy ket nagaburan kadagiti narpoog a pasdek ken pagtaengan. Rinibo a residente dagiti agsagaba pay laeng ti nakaro a buteng kasta metten iti makunkuna a trauma.
Ti Provincial Government of Ilocos Norte (PGIN) babaen iti panangidaulo da Gob. Cecilia Araneta-Marcos ken Bise Gob. Matthew J. Marcos Manotoc ket ensigida a nangipadanon ti pannakipagriknada kadagiti residente ti Cebu a naapektaran iti gingined. Malaksid iti dayta, naipatulod nga ensigida dagiti pakpakauna nga tulong (relief goods) kadagiti apektado a kakailian. Uray ni Senadora Imee R. Marcos ket ensigida met a nangipaay ti pakpakauna a tulongna kadagiti naapektaran a kakailian. Ti Pamilia Marcos kangrunaanna kada Senadora Imee ken Bise Gobernador Marcos Manotoc ket inbilangdan a kameng ti pamiliada dagiti residente iti Cebu.
Ni Presidente Ferdinand R. Marcos Jr. ket ensigida met a nagturong kadagiti lugar a kangrunaan a naapektaran iti daytoy a kalamidad kagiddan ti panangipaayna ti pakpakauna a tulong kadagiti nagbalin a biktima. Inpasigurado ti presidente ti panangipaay ti administrasiona iti naan-anay a tulong agingga a dagitoy ket makabangon babaen iti pannakausar dagiti amin a resources ti gobierno.
Ti pagilian a Pilipinas ket maysa kadagiti pagpagilian iti intero a lubong a kanayon nga makasagsagrap kadagiti kalamidad kas iti bagyo, layus pakairamanan ti gingined gapu iti kaaddatayo iti makunkuna a Ring of Fire. Daytoy met ti rason no apay a kanayon dagiti isaysayangkat ti gobierno a panagsagsagana kas kadagiti maisaysayangkat nga earthquake drill.
NYC, nangirubuat ti donation drive para kadagiti apektado ti gingined idiay Cebu
Tumulong ti National Youth Commission (NYC) kadagiti naapketaran iti gingined idiay Cebu. Daytoy ket babaen iti nairubuat a donation drive wenno panagukkon kadagiti kangrunaan a maipaay a tulong kadagiti nadidigraan. Gapu iti daytoy, ti NYC ket agkidkiddaw ti tulong kadagiti amin a kakailian a mangipaay ti sangkabassit a tulong tapno maipaay kadagiti biktima ti gingined. Dagiti kangrunaan a masapul iti agdama dagiti biktima ket pakaibilangan dagiti sumaganad; Ready-to-eat food, Bottled water, Tents.
Dagiti interesado a mangipaay ti tulong, mabalinyo nga ideretso kadagiti maibilang a Drop-off Locations: NYC Cebu Area Office – 5/F, 82 Vibo Center Building, N. Escario St., Brgy. Camputhaw, Cebu City. Kasta metten ti Cebu Provincial Capitol. Maki-koordinar laeng kadagiti NYC Cebu Area Officers — kas kada Ms. Cherry (09661344333) ken Ms. Cybel (09429497145).
Agkikibintayo a mangipaay ti suporta ken tulong kadagiti kakabsattayo a naapektaran iti didigra tapno iti kasta ket saanda unay a marikna ti rigat nga inda paspasaren iti agdama.
INEC tulong a mangipasubli ti koriente idiay Masbate
Nangipatulod Ilocos Norte Electric Cooperative (INEC) ti maysa a grupo idiay Masbate Electric Cooperative (MASELCO) tapno tumulong a mangisubli ti serbisio ti koriente iti probinsia ti Masbate. Gapu iti pigsa ti angin ken tudo nga insangbay ni Bagyo Opong, naruay a pasilidad ti MASELCO ti nadadael. Ti nasao a probinsia ti kangrunaan a nagsarap ti naruay a perdision gapu iti nakaro nga epekto ti nasao a bagyo.
Kalpasan a naamuan ti INEC ti kaadu a perdision iti nasao a probinsia, ensigida a nagplano ni Asst. General Manager Perry Martinez pakairamanan ni Atty. Nikki Pilar tapno mabukel ti maysa a grupo nga agturong iti probinsia ti Masbate tapno tumulong a mangisubli ti serbisio ti koriente. Ti INEC ket datin nga agtur-turong tapno tumulong kadagiti lugar a nagsagrap iti nakaro a perdision gapu kadagiti napipigsa a bagyo.
Itay kallabes, ti Ilocos Norte ti nagpasar iti nakaro nga epekto ni Super Typhoon Nando a nangitunda iti pannakadadael dagiti linia ti koriente. Ensigida met a nangipaay ti tulong dagiti lima nga electric cooperatives ti Region 1. Babaen iti nabukel a Region 1 Electric Cooperative Task Force, a pakaibilangan ti Ilocos Sur Electric Cooperative (ISECO), La Union Electric Cooperative (LUELCO), Pangasinan Electric Cooperative I (PANELCO I), Central Pangasinan Electric Cooperative (CENPELCO), ken Pangasinan Electric Cooperative III (PANELCO III), alisto a naisubli ti serbisio ti koriente kadagiti amin nga Member Consumers ti INEC.
